Mark 9

1Mo idibakes, ilana, “Mounid adibakeimiy, mwasanin yakamiy nukutablawaws wasalig nag bukukwanigs tage bukusesus-wan mo bukukines Yowbad nakaleiwag beim, son natawtoun.”

Yeisuw ivag ankakin kweitan

(Matiw 17:1-13; Luk 9:28-36)

2Yam kweinim katanok ikous, Yeisuw mo itokes Pita, Yemes, Yon, ikatulags ineis koy avakaein wakunuwatan; tasiyas-wan isiwas. Wamtes mo ivag ankakin kweitan, anakweim ivag ankakin gimagim, pwapwa̱kaw igegayous; nag teitan gamag ven watinow anakweim bivag pwapwaka̱wun ma̱wan, nag.

4Mo ikines Ilaytiy son Moses isaps, sisiy Yeisuw illivans.

5Iw to Pita, idibek Yeisuw, ilana, “Tamwey, bo tamwa̱saws peinan tasesus towen; bakawlul bunatoun bwan, bunatan ya̱koum, buniyuwein Moses, buntounun Ilaytiy.” Anilivan ma̱wana illivan mav; na-ikakin aveiyag bilivan, peinan aspwa̱yat.

7Mo lov kweitan ilumwes tasiyas, aygan teitan iliganes wa̱lov, ilana, “Mtowen natug bwanabwein, kuliganes aygan.”

8Nuwanaw mo ikins palatan palatan, makaw; misinaka Yeisuw sisiy.

9Wankuyeim iwloubus, idibakes, ilana, “Youd towen nukukines, awoum kwamteles gamag mwasanin wasigeis ee... Gimgilitoun yey bakanig, ba̱kit vayuwein, mo kwamteles wasigeis.”

10Youd towen nag ikamteles gamag mwasanin wasigeis; tage tasiyas-wan illivans, idokes aveiyag silawun anilivan towen, “Bakanig mo ba̱kit vayuwein.”

11Iweis tasiyas, ilansa, “Aveiyag wawun tasiyas takatimlakeins kaleiwag asilivan, ilansa, ‘Kadiloka Ilaytiy bimgwey Mesay waseg’?”

12Yeisuw gog mo idibakes, ilana, “Ilaytiy iginmug, ikatilow youd babaw. Tabta kukwakins silawun Bukitab liva̱nen Gimgilitoun nises, mamagina, ‘Gamag bipiyaves; a̱ban bigeg singay’? Adibakeimiya mtowen-vak Ilaytiy bo neim, itam ninous mo iyagages towen, ma̱wan liva̱nen nises Bukitab waseg.”

Gwad teitan takatoun Yeisuw ivag ibwein

(Matiw 17:14-20; Luk 9:37-43)

14Yeisuw siney navamul asteitoun, tavasin gog mtowen, mo iwloubus iwekes navamul meivek-wan watinow nisesus, ikines gamag singay babaw nisiwnis, tasiyas takatimlakeins kaleiwag nikikamnimans sisiyas navamul mwasanin.

15Gamag babaw ikines Yeisuw bo neim, isom ninous, isawls inekes, imulouls sisiy.

16Iw to Yeisuw, ilana, “Aveiyag silawun mikamniman?”

17Iw teitan gamag, ilana, “Tamwey, natug towen amey va̱gan bukukin, peinan yeiluw neiweiy bo ikakon. Kukin beiweiy mo bikalavatouw bikabala̱wein, beipoul wadon, bikakil kimwatun, bilamtumweitol won. Bo adibakes muvamuls va̱gan bikayabes. Iyokons bo nag.”

19Iw to Yeisuw, ilana, “Takakons yakamiy! Tut kadiveiyov sigwey yakamiy nitasesus bo asoumat. Gwad towen kumey waseg yey.”

20Imeyes gwad towen waseg Yeisuw, yeiluw ikin Yeisuw, iweiy gwad towen, itatat won, ikalivatow wapwepway, ikanivnavin, ipoul wadon.

21Yeisuw mo ikatigan taman, ilana, “Kweivin tut ankatoun ma̱wan?”

Ilana, “Igaw-o wagwa̱din. Tut babaw iwaweiy, ikalivatow in wa̱kov o wayvagam, sivinan bilbaleb. O Tamwey, tabta binok nuwam yakamey? Tabta ikadilokeim bukulabem?”

23Iw to Yeisuw, ilana, “Aveiyag wawun amlivan kulana, ‘Tabta ikadilokeim’? Kukin bitasimounid, sinap o wotet babaw mo bikadilokeid.”

24Gwad to taman mo igel, ilana, “Asimounid-wan; tage kulabeig va̱gan basimounid beibwein.”

25Yeisuw gog ikin gamag babaw isisawls imimeis, mo idibek yeiluw towen, ilana, “Yeiluw yak, gwad towen nukuvag nikakon, adibakeim kulisow gwad towen, kusiwana, awoum kuvgavaw bukumek gwad towen; awoum.”

26Iligen, mo iwak, iweiy gwad towen, itatat won, mo ilisow gwad kabalamat nimmasis ma̱wana takanig, babaw gamag idokes bo ikanig.

27Yeisuw gog iyous naman, itamnow gwad towen, itamanaw.

28Wankuyeim Yeisuw mo inoun in isiw wabunatum, navamul mo inekes, tasiyas-wan illivans, ilansa, “Aveiyag wawun na-ikadilokem bakakayeb?”

29Iw to Yeisuw, ilana, “Singay keikay anka̱yob bitakayabes tasiyas; misinaka bitanitoug waseg Yowbad mo bitakayeb.”

Yeisuw ilivnek bikanig mo beikit vayuwein

(Matiw 17:22-23; Luk 9:43-45)

30Ilisawes ven towen, mo ikanpeles Galiliy, inounas; tage nag sivinan gamag bikakins.

31Inawotet gog ikatimlakes navamuls, ilana, “Gimgilitoun yey, teitan gamag bisilkodeig mo gamag mwasanin biyousigs, beiweigs bakanig, bammasis kweitoun yam mo ba̱kit vayuwein.”

32Anilivan towen na-ikakins tasiyas; aspwa̱yat bikatiga̱nes silawun livan towen.

Tasiyas astamumug

(Matiw 18:1-5; Luk 9:46-48)

33Inounas ineis ven Kapaneyum, isiws wabunatum, mo ikatiga̱nes, ilana, “Aw-livan wa̱ked nukuliva̱nes, ne?”

34Tasiyas gog isesusa ikka̱pays, peinan wa̱ked nikamnimans, idokes kal biguyaw.

35Mapuna isin, idawes tasiyas sinawatan teiy, imeis, idibakes, ilana, “Kal yakamiy sivinan biguyaw, kadiloka bimlatoul, babaw gamag bimugwas, mtowen bikuyeim, o bikanow ages gamag babaw.”

36Ilivan ikous, mo itok gwad teitan, imey, isein wamtes tasiyas, mo inup iwlibob, idibakes, ilana, “Kal ya̱koum bileb teitan gwad, ma̱wana gwad towen, peinan gungamag towen, mamagina bilabeig yey, o mamagina bileb mtowen Tamag nikayabeig nam.”

Kukin gamag nag bisilbwadeid mamagina bilabeid

(Luk 9:49-50)

38Iw to Yon, ilana, “Tamwey, nakakin taw teitan ikayabes yeiluw, yagam yak waseg, kasilbwed, peinan nag ibwa̱kun wasigeis ya̱kids.”

39Yeisuw gog ilivan, ilana, “Awoum kusilbwed. Nag kal biwotet tawtoun yagag waseg mo nuwanaw bitawyageig, nag. Kukin kal nag isilbwadeids mamagina ilabeids-nan.

41“Kukin kal bisekeimiy amisoup bukumoums peinan kuwteles Kelis nawotet, mounid adibakeimiy nag biyamkwen maysan mtowen.

Sinap kalbaleb

(Matiw 18:6-9; Luk 17:1-2)

42“Gamagal tasiyas isimounids waseg yey, kukin kal bikatsilakes silma̱nin bikakins sinap kalbaleb, singay kalbaleb mo bilouvat gamag towen. Kukin gamag mwasanin bikawes dakul avakaein biyawanis kayon mo bilaves bein wabwanit, nakalbaleb towen kalamwey; tage kukin bisesuna ee... bikatsilek teitan gwad, singaya kalbaleb mo bilouvat.

43“Kukin gog namam bikatsilakeim silma̱nin amsinap kalbaleb, kadiloka kubob, wankuyeim namam palatanok mo bukuban mwamovam. Awoum namam paley bilaveims bukun wadiginasim, kov nigidaged bigabum tut nag beikous.

45“Kukin gog kakeim bikatsilakeim silma̱nin amsinap kalbaleb, kadiloka kubob, wankuyeim kakeim palatanok mo bukuban mwamovam. Awoum ge kakeim paley bilaveims bukun wadiginasim.

47“Kukin matam bikatsilakeim silma̱nin amsinap kalbaleb, kadiloka kugut kulev, igaw wankuyeim matam palatanok mo bukusiw wanuwan Yowbad nakabkaleiwag. Awoum matam paley bilaveim bukun wadiginasim; simwa̱mwats bitatets wa̱wom; o kov bigidaged-wan; nag beimat.

49“Kov bigabuds va̱gan bitayayan.

50“Sol bwanabwein bo bwein. Kukin gog sol bigeg, nag sabal-nen bitaban vayuwein. Sol bises wasigeis yakamiy bo bwein, va̱gan bukumsamwas simsimiyas wasigeis.”